جو وصف رکھا ہے وہ بے مثال رکھا ہے

جو وصف رکھا ہے وہ بے مثال رکھا ہے

بشر میں اپنا خدا نے جمال رکھا ہے

انہیں تو بخشی ہیں خوشیاں بنانے والے نے

ہمارے واسطے رنج و ملال رکھا ہے

ہر ایک لمحہ نئی آفتیں اترتی ہیں

ہمارا کتنا فلک نے خیال رکھا ہے

ہماری بزم میں آؤ تو غیر سے بھی ملو

یہ میرے سامنے اس نے سوال رکھا ہے

یہ کس کے دھوکے میں میخانے آ گئے واعظ

اماں میں ہم ہیں تمہیں بھی سنبھال رکھا ہے

کچھ اپنے جیب و گریباں کی سدھ تو لے ساقیؔ

بنا کے تو نے عجب اپنا حال رکھا ہے