jo yaad-e-yar se guft-o-shunid kar li hai

jo yād-e-yār se guft-o-shunīd kar lī hai

to goyā phuul se ḳhushbū kashīd kar lī hai

judā.iyoñ meñ bhī DhūñDī haiñ qurbateñ maiñ ne

zarar-rasāñ thī jo shai vo mufīd kar lī hai

nahīñ khule the jo manzar mirī basārat par

tasavvurāt meñ un kī bhī diid kar lī hai

sitāre Taañk diye haiñ falak kī chādar par

aur apnī chādar-e-shab be-navīd kar lī hai

maiñ chāhtā to use kuchh qarīb le aatā

masarratoñ kī jo saa.at ba.iid kar lī hai

use to dukh hī nahīñ kuchh mirī judā.ī kā

sazā ḳhud apne liye hī shadīd kar lī hai

use bhulāne kī koshish meñ yaad kar kar ke

ḳhud apnī ziist hī mushkil mazīd kar lī hai

husain ibn-e-alī kī taraf hī lauTeñge

jinhoñ ne bai.at-e-fikr-e-yazīd kar lī hai

atā-e-'mīr' hai mujh par ki maiñ ne bhī raushan

ġhazal kī sham.a ba-tarz-e-jadīd kar lī hai

jachā hai ab kahīñ jā kar 'nasīm' jāma-e-zīst

kahīñ kahīñ se jo qat-o-burīd kar lī hai

jo yaad-e-yar se guft-o-shunid kar li hai

to goya phul se KHushbu kashid kar li hai

judaiyon mein bhi DhunDi hain qurbaten main ne

zarar-rasan thi jo shai wo mufid kar li hai

nahin khule the jo manzar meri basarat par

tasawwuraat mein un ki bhi did kar li hai

sitare Tank diye hain falak ki chadar par

aur apni chadar-e-shab be-nawid kar li hai

main chahta to use kuchh qarib le aata

masarraton ki jo saat baid kar li hai

use to dukh hi nahin kuchh meri judai ka

saza KHud apne liye hi shadid kar li hai

use bhulane ki koshish mein yaad kar kar ke

KHud apni zist hi mushkil mazid kar li hai

husain ibn-e-ali ki taraf hi lauTenge

jinhon ne baiat-e-fikr-e-yazid kar li hai

ata-e-'mir' hai mujh par ki main ne bhi raushan

ghazal ki shama ba-tarz-e-jadid kar li hai

jacha hai ab kahin ja kar 'nasim' jama-e-zist

kahin kahin se jo qat-o-burid kar li hai