jo zamane ka ham-zaban na raha

jo zamāne kā ham-zabāñ na rahā

vo kahīñ bhī to kāmrāñ na rahā

is tarah kuchh badal ga.ī hai zamīñ

ham ko ab ḳhauf-e-āsmāñ na rahā

jaane kin mushkiloñ se jiite haiñ

kyā kareñ koī mehrbāñ na rahā

aisī begānagī nahīñ dekhī

ab kisī kā koī yahāñ na rahā

har jagah bijliyoñ kī yūrish hai

kyā kahīñ apnā āshiyāñ na rahā

muflisī kyā gila kareñ tujh se

saath terā kahāñ kahāñ na rahā

hasrateñ baḌh ke chūmtī haiñ qadam

manziloñ kā koī nishāñ na rahā

ḳhūn-e-dil apnā jal rahā hai magar

sham.a ke sar pe vo dhuāñ na rahā

ġham nahīñ ham tabāh ho ke rahe

hādsa bhī to nā-gahāñ na rahā

qāfile ḳhud sambhal sambhal ke baḌhe

jab koī mīr-e-kārvāñ na rahā

jo zamane ka ham-zaban na raha

wo kahin bhi to kaamran na raha

is tarah kuchh badal gai hai zamin

hum ko ab KHauf-e-asman na raha

jaane kin mushkilon se jite hain

kya karen koi mehrban na raha

aisi beganagi nahin dekhi

ab kisi ka koi yahan na raha

har jagah bijliyon ki yurish hai

kya kahin apna aashiyan na raha

muflisi kya gila karen tujh se

sath tera kahan kahan na raha

hasraten baDh ke chumti hain qadam

manzilon ka koi nishan na raha

KHun-e-dil apna jal raha hai magar

shama ke sar pe wo dhuan na raha

gham nahin hum tabah ho ke rahe

hadsa bhi to na-gahan na raha

qafile KHud sambhal sambhal ke baDhe

jab koi mir-e-karwan na raha