josh-e-wahshat mein musallam ho gaya islam-e-ishq

josh-e-vahshat meñ musallam ho gayā islām-e-ishq

kūcha-gardī se mirī puurā huā ehrām-e-ishq

mere marne se khulā hāl-e-mohabbat ḳhalq par

sañg-e-marqad ban gayā ā.īna-e-anjām-e-ishq

ye sila paayā vafā kā husn kī sarkār se

chehra-e-āshiq kī zardī hai zar-e-in.ām-e-ishq

pahle thā ruḳh kā tasavvur ab hai gesū kā ḳhayāl

vo thī sub.h-e-ishq goyā aur ye hai shām-e-ishq

āstān-e-yār par har vaqt sajde kījiye

hai yahī bas dīn-e-ishq īmān-e-ishq islām-e-ishq

huuñ asīr-e-zulf zāhir hai ḳhat-e-taqdīr se

dā.ere harfoñ ke mil kar ban ga.e haiñ dām-e-ishq

arsh-e-a.azam se bhī ūñchī ho ga.ī merī fuġhāñ

aaj tak paayā na ai 'āzād' auj-e-bām-e-ishq

josh-e-wahshat mein musallam ho gaya islam-e-ishq

kucha-gardi se meri pura hua ehram-e-ishq

mere marne se khula haal-e-mohabbat KHalq par

sang-e-marqad ban gaya aaina-e-anjam-e-ishq

ye sila paya wafa ka husn ki sarkar se

chehra-e-ashiq ki zardi hai zar-e-inam-e-ishq

pahle tha ruKH ka tasawwur ab hai gesu ka KHayal

wo thi subh-e-ishq goya aur ye hai sham-e-ishq

aastan-e-yar par har waqt sajde kijiye

hai yahi bas din-e-ishq iman-e-ishq islam-e-ishq

hun asir-e-zulf zahir hai KHat-e-taqdir se

daere harfon ke mil kar ban gae hain dam-e-ishq

arsh-e-azam se bhi unchi ho gai meri fughan

aaj tak paya na ai 'azad' auj-e-baam-e-ishq