josh-e-wahshat mere talwon ko ye iza bhi sahi

josh-e-vahshat mere talvoñ ko ye iizā bhī sahī

haiñ jahāñ sau aable kuchh ḳhār-e-sahrā bhī sahī

dil meñ sau bāteñ haiñ ik terī tamannā bhī sahī

sar pe haiñ laakh āfateñ ik dāġh-e-saudā bhī sahī

muñh pe āñchal lījiye mujh se jo aatā hai hijāb

gar yahī manzūr hai thoḌā sā parda bhī sahī

dil meñ vaqt-e-zab.h hai hasrat ki tum ko dekh leñ

marte marte ḳhair jiine kī tamannā bhī sahī

ham adam se yaañ na aate the to samjhātā thā dil

ik nazar gulzār-e-hastī kā tamāshā bhī sahī

merā hāl-e-saḳht-jānī sun ke farmāne lage

teġh ke saath ek abrū kā ishārā bhī sahī

garm aaheñ kar chukā ab khīñchtā huuñ sard aah

lījiye ThanDī havā kā ek jhoñkā bhī sahī

kyuuñ bigaḌiye husn-o-rif.at meñ kise inkār hai

aap yūsuf bhī sahī rashk-e-masīhā bhī sahī

apne dil ko gar pasand aa.e to jāneñ ḳhuub hai

ham ne maanā yaar tum se koī achchhā bhī sahī

tīra-baḳhtoñ ke mazāroñ par na hogī raushnī

aazmā dekho charāġh-e-dast-e-mūsā bhī sahī

chārasāzoñ kī ḳhushī hai zaḳhm par hoñ yā na hoñ

marham-e-zañgār kā ek-ādh phāhā bhī sahī

tere sar se paañv tak barsoñ meñ jaatī hai nazar

har jagah par kahtī hai yaañ kā tamāshā bhī sahī

dil jigar meñ kuchh nahīñ siine meñ haiñ par aas hai

bazm kī zīnat ko ḳhālī jām-o-mīnā bhī sahī

ye to zāhir ho gayā tum martabe meñ ho buland

ab masīhā se masīhā.ī kā da.avā bhī sahī

us ke dar par jā ke kuchh hāsil na hogā ai 'rashīd'

koī bolā bhī sahī tum ne pukārā bhī sahī

josh-e-wahshat mere talwon ko ye iza bhi sahi

hain jahan sau aable kuchh KHar-e-sahra bhi sahi

dil mein sau baaten hain ek teri tamanna bhi sahi

sar pe hain lakh aafaten ek dagh-e-sauda bhi sahi

munh pe aanchal lijiye mujh se jo aata hai hijab

gar yahi manzur hai thoDa sa parda bhi sahi

dil mein waqt-e-zabh hai hasrat ki tum ko dekh len

marte marte KHair jine ki tamanna bhi sahi

hum adam se yan na aate the to samjhata tha dil

ek nazar gulzar-e-hasti ka tamasha bhi sahi

mera haal-e-saKHt-jaani sun ke farmane lage

tegh ke sath ek abru ka ishaara bhi sahi

garm aahen kar chuka ab khinchta hun sard aah

lijiye ThanDi hawa ka ek jhonka bhi sahi

kyun bigaDiye husn-o-rifat mein kise inkar hai

aap yusuf bhi sahi rashk-e-masiha bhi sahi

apne dil ko gar pasand aae to jaanen KHub hai

hum ne mana yar tum se koi achchha bhi sahi

tira-baKHton ke mazaron par na hogi raushni

aazma dekho charagh-e-dast-e-musa bhi sahi

chaarasazon ki KHushi hai zaKHm par hon ya na hon

marham-e-zangar ka ek-adh phaha bhi sahi

tere sar se panw tak barson mein jati hai nazar

har jagah par kahti hai yan ka tamasha bhi sahi

dil jigar mein kuchh nahin sine mein hain par aas hai

bazm ki zinat ko KHali jam-o-mina bhi sahi

ye to zahir ho gaya tum martabe mein ho buland

ab masiha se masihai ka dawa bhi sahi

us ke dar par ja ke kuchh hasil na hoga ai 'rashid'

koi bola bhi sahi tum ne pukara bhi sahi