juda hai tera saliqa hai tera Dhang alag

judā hai terā salīqa hai terā Dhang alag

lage hai saare manāzir meñ terā rang alag

ravāñ thā garm lahū āhanī parindoñ meñ

chhaḌī thī amn-pasandoñ meñ sard-jang alag

na.ī dishāoñ se masmūm āñdhiyāñ uTThīñ

to āsmāñ bhī badalne lagā thā rang alag

nishāt-e-fan to bahar-hāl apnī qismat hai

hazār apne masā.il haiñ un se jang alag

siyāh abr huuñ sūraj se chhīn lūñgā ziyā

karūñgā qaus-e-quzah ke maiñ rang rang alag

judā haiñ tund havāoñ ke ātishīñ naġhme

to pāniyoñ ke tarāne haiñ zer-e-sang alag

maiñ apnī shaam ko sub.h-e-hisāb kahtā huuñ

magar vo shaam jo guzrī hai tere sang alag

ġhazal ke dar pe baḌā izhdihām hai lekin

'nizām' naam hai jis kā vo ik malang alag

juda hai tera saliqa hai tera Dhang alag

lage hai sare manazir mein tera rang alag

rawan tha garm lahu aahani parindon mein

chhaDi thi amn-pasandon mein sard-jang alag

nai dishaon se masmum aandhiyan uTThin

to aasman bhi badalne laga tha rang alag

nishat-e-fan to bahar-haal apni qismat hai

hazar apne masail hain un se jang alag

siyah abr hun suraj se chhin lunga ziya

karunga qaus-e-quzah ke main rang rang alag

juda hain tund hawaon ke aatishin naghme

to paniyon ke tarane hain zer-e-sang alag

main apni sham ko subh-e-hisab kahta hun

magar wo sham jo guzri hai tere sang alag

ghazal ke dar pe baDa izhdiham hai lekin

'nizam' nam hai jis ka wo ek malang alag