judaiyon se jo paiman kar raha hun main

judā.iyoñ se jo paimān kar rahā huuñ maiñ

ye mushkileñ tirī āsān kar rahā huuñ maiñ

bilā-javāz lagā.ī nahīñ hai ḳhud ko aag

bujhe charāġh pe ehsān kar rahā huuñ maiñ

zarā bhī ḳhaak uḌaa.ī nahīñ hai vahshat meñ

guzarne vāloñ ko hairān kar rahā huuñ maiñ

lagā rahā huuñ jo maiñ baar baar dil se tujhe

ye apne jism ko gul-dān kar rahā huuñ meñ

mujhe ḳhabar thī judā.ī meñ fā.eda hai magar

sabhī ne samjhā ki nuqsān kar rahā huuñ maiñ

hai mere paas ik achchhī ḳhabar barā-e-junūñ

zarā ruko koī elaan kar rahā huuñ maiñ

javāz koī nahīñ dūsrī mohabbat kā

ye aur baat ki 'mannān' kar rahā huuñ maiñ

judaiyon se jo paiman kar raha hun main

ye mushkilen teri aasan kar raha hun main

bila-jawaz lagai nahin hai KHud ko aag

bujhe charagh pe ehsan kar raha hun main

zara bhi KHak uDai nahin hai wahshat mein

guzarne walon ko hairan kar raha hun main

laga raha hun jo main bar bar dil se tujhe

ye apne jism ko gul-dan kar raha hun mein

mujhe KHabar thi judai mein faeda hai magar

sabhi ne samjha ki nuqsan kar raha hun main

hai mere pas ek achchhi KHabar bara-e-junun

zara ruko koi elan kar raha hun main

jawaz koi nahin dusri mohabbat ka

ye aur baat ki 'mannan' kar raha hun main