jugnu aur sitare kya mahtab shikasta-haal

jugnū aur sitāre kyā mahtāb shikasta-hāl

diye kī lau ūñchī rakhne ke ḳhvāb shikasta-hāl

ek usī naġhme kī dhun meñ jis kī talab hai dil ko

chuTkī lahū meñ tar dekheñ mizrāb shikasta-hāl

hameñ to apnī ḳhush-ahvālī ek nahīñ bhātī

ye kyā ham ḳhush-hāl raheñ ahbāb shikasta-hāl

kartab ke is daur ne ham ko diye haiñ vo kirdār

rustam chāroñ ḳhāne chit sohrāb shikasta-hāl

jab jab ġhaur kareñ duniyā par ġhaur kā har anjām

andar andar kar jaa.e 'shādāb' shikasta haal

jugnu aur sitare kya mahtab shikasta-haal

diye ki lau unchi rakhne ke KHwab shikasta-haal

ek usi naghme ki dhun mein jis ki talab hai dil ko

chuTki lahu mein tar dekhen mizrab shikasta-haal

hamein to apni KHush-ahwali ek nahin bhati

ye kya hum KHush-haal rahen ahbab shikasta-haal

kartab ke is daur ne hum ko diye hain wo kirdar

rustam chaaron KHane chit sohrab shikasta-haal

jab jab ghaur karen duniya par ghaur ka har anjam

andar andar kar jae 'shadab' shikasta haal