junun bigDi hui haalat ke banne ka guman kab tak

junūñ bigḌī huī hālāt ke banñe kā gumāñ kab tak

girebāñ jā chukā kab kā raheñgī dhajjiyāñ kab tak

mohabbat-nā-shanāsoñ meñ mohabbat kī fuġhāñ kab tak

na jaane kaT ke dil se kaam degī ab zabāñ kab tak

tahayya kar chuke jis bevafā ko bhuul jaane kā

usī kī yaad āḳhir dil meñ legī chuTkiyāñ kab tak

idhar tinkā uThāyā aur udhar phir barq ne pūchhā

ki phir tayyār ho jā.egā ban kar āshiyāñ kab tak

khule kuchh paikar-e-ummīd yā ye vahm miT jaa.e

nazar ā.eñgī dhuñdlī dhuñdlī sī parchhā.iyāñ kab tak

tumhārī aas par kis kis tarah dil ko na samjhāyā

magar ye ehtimām-e-ḳhud-farebī mehrbāñ kab tak

'razā' kab se yahī fariyād hai bāġh-e-tamannā kī

mujhe luuTe chalā jā.egā merā bāġhbāñ kab tak

junun bigDi hui haalat ke banne ka guman kab tak

gireban ja chuka kab ka rahengi dhajjiyan kab tak

mohabbat-na-shanason mein mohabbat ki fughan kab tak

na jaane kaT ke dil se kaam degi ab zaban kab tak

tahayya kar chuke jis bewafa ko bhul jaane ka

usi ki yaad aaKHir dil mein legi chuTkiyan kab tak

idhar tinka uThaya aur udhar phir barq ne puchha

ki phir tayyar ho jaega ban kar aashiyan kab tak

khule kuchh paikar-e-ummid ya ye wahm miT jae

nazar aaengi dhundli dhundli si parchhaiyan kab tak

tumhaari aas par kis kis tarah dil ko na samjhaya

magar ye ehtimam-e-KHud-farebi mehrban kab tak

'raza' kab se yahi fariyaad hai bagh-e-tamanna ki

mujhe luTe chala jaega mera baghban kab tak