junun-e-be-KHudi ke saz-o-saman dekhne wale

junūn-e-be-ḳhudī ke sāz-o-sāmāñ dekhne vaale

baḌī hairat meñ haiñ merā garebāñ dekhne vaale

tumhārī zulf kī uljhan meñ phañs kar niiñd kho baiThe

kabhī sote nahīñ ḳhvāb-e-pareshāñ dekhne vaale

abhī bhaḌkegā soz-e-ġham abhī ye zaḳhm kūdeñge

zarā Thahreñ mire dil kā charāġhāñ dekhne vaale

mirī Thahrī huī duniyā meñ halchal sī machā Daalī

dabe-pāñv chaleñ gor-e-ġharībāñ dekhne vaale

kahīñ sotī huī duniyā na pā.emāl ho jaa.e

zarā āhista ai gor-e-ġharībāñ dekhne vaale

uThā.eñge na ai 'naḳhshab' kabhī nazreñ sū-e-jannat

tasavvur meñ bahār-e-kū-e-jānāñ dekhne vaale

junun-e-be-KHudi ke saz-o-saman dekhne wale

baDi hairat mein hain mera gareban dekhne wale

tumhaari zulf ki uljhan mein phans kar nind kho baiThe

kabhi sote nahin KHwab-e-pareshan dekhne wale

abhi bhaDkega soz-e-gham abhi ye zaKHm kudenge

zara Thahren mere dil ka charaghan dekhne wale

meri Thahri hui duniya mein halchal si macha Dali

dabe-panw chalen gor-e-ghariban dekhne wale

kahin soti hui duniya na paemal ho jae

zara aahista ai gor-e-ghariban dekhne wale

uThaenge na ai 'naKHshab' kabhi nazren su-e-jannat

tasawwur mein bahaar-e-ku-e-jaanan dekhne wale