junun-e-dil ko kisi ka bhi eatibar nahin

junūn-e-dil ko kisī kā bhī e.atibār nahīñ

huuñ be-qarār magar ḳhvāhish-e-qarār nahīñ

hai kā.enāt meñ ham se faroġh-e-rang-e-bahār

magar hayāt meñ apnī zarā bahār nahīñ

na chheḌ pyaar ke naġhme ai andalīb-e-chaman

ki rang gulshan-e-hastī kā sāzgār nahīñ

tufail hai ye unhīñ kā ki ham ko tohfe meñ

vo be-hisāb mile ġham ki kuchh shumār nahīñ

'asad' khulā na kabhī rāz-e-zindagī ab tak

ye uqda khole koī aisā hoshiyār nahīñ

junun-e-dil ko kisi ka bhi eatibar nahin

hun be-qarar magar KHwahish-e-qarar nahin

hai kaenat mein hum se farogh-e-rang-e-bahaar

magar hayat mein apni zara bahaar nahin

na chheD pyar ke naghme ai andalib-e-chaman

ki rang gulshan-e-hasti ka sazgar nahin

tufail hai ye unhin ka ki hum ko tohfe mein

wo be-hisab mile gham ki kuchh shumar nahin

'asad' khula na kabhi raaz-e-zindagi ab tak

ye uqda khole koi aisa hoshiyar nahin