جنون عشق ہے اور شغل جادہ پیمائی

جنون عشق ہے اور شغل جادہ پیمائی

تری تلاش میں عقل و خرد نہ کام آئی

بہ فیض عشق یہ ہے اپنی شان رسوائی

ہوئے ہیں لالہ و گل مہر و مہ تماشائی

ترے شہود سے ممکن نہیں ہے دل کو سکوں

کہ کثرتوں کی ہے مظہر یہ شان یکتائی

مرے جنون کی رفعت سے تو نہیں واقف

تجھے دماغ ہے کیوں اے فروغ لیلائی

لرز اٹھا ہے ہر اک تار ساز ہستی کا

یہ کس کی کانوں میں آواز دل نواز آئی

بنا دیا تھا کچھ ایسا تری محبت نے

خود اپنے حال پہ اکثر مجھے ہنسی آئی

نکل نہ جائے کہیں منہ سے آہ اے ثاقبؔ

جواب دینے لگی طاقت شکیبائی