junun-e-ishq hai aur shaghl-e-jada-paimai

junūn-e-ishq hai aur shaġhl-e-jāda-paimā.ī

tirī talāsh meñ aql-o-ḳhirad na kaam aa.ī

ba-faiz-e-ishq ye hai apnī shān-e-rusvā.ī

hue haiñ lāla-o-gul mehr-o-mah tamāshā.ī

tire shuhūd se mumkin nahīñ hai dil ko sukūñ

ki kasratoñ kī hai maz.har ye shān-e-yaktā.ī

mire junūn kī rif.at se tū nahīñ vāqif

tujhe dimāġh hai kyoñ ai faroġh-e-lailā.ī

laraz uThā hai har ik taar sāz-e-hastī kā

ye kis kī kānoñ meñ āvāz-e-dil-navāz aa.ī

banā diyā thā kuchh aisā tirī mohabbat ne

ḳhud apne haal pe aksar mujhe hañsī aa.ī

nikal na jaa.e kahīñ muñh se aah ai 'sāqib'

javāb dene lagī tāqat-e-shakebā.ī

junun-e-ishq hai aur shaghl-e-jada-paimai

teri talash mein aql-o-KHirad na kaam aai

ba-faiz-e-ishq ye hai apni shan-e-ruswai

hue hain lala-o-gul mehr-o-mah tamashai

tere shuhud se mumkin nahin hai dil ko sukun

ki kasraton ki hai mazhar ye shan-e-yaktai

mere junun ki rifat se tu nahin waqif

tujhe dimagh hai kyon ai farogh-e-lailai

laraz uTha hai har ek tar saz-e-hasti ka

ye kis ki kanon mein aawaz-e-dil-nawaz aai

bana diya tha kuchh aisa teri mohabbat ne

KHud apne haal pe aksar mujhe hansi aai

nikal na jae kahin munh se aah ai 'saqib'

jawab dene lagi taqat-e-shakebai