جنون عشق کو بھی ہم علاج غم سمجھتے ہیں

جنون عشق کو بھی ہم علاج غم سمجھتے ہیں

جو دل پر زخم لگتا ہے اسے مرہم سمجھتے ہیں

ہے جس کو اس زمانے میں بس اپنے کام سے مطلب

اسے انسانیت کے واسطے ہم سم سمجھتے ہیں

کہو یہ داستان رنج و غم تم غیر سے جا کر

ہم ایسی بے تکی باتیں بہت ہی کم سمجھتے ہیں

سکون اس کو میسر ہو گیا یہ مل گئی جس سے

نگاہ یار کو ہم پھول پر شبنم سمجھتے ہیں

بنا انسانیت کی ڈال دی جس ذات نے انجمؔ

اسے اہل خرد سرمایۂ آدم سمجھتے ہیں