junun-e-ishq mein sad-chaak hona paDta hai

junūn-e-ishq meñ sad-chāk honā paḌtā hai

is intihā ke liye ḳhaak honā paḌtā hai

kisī se jab kabhī ham zindagī badalte haiñ

to phir badan kī bhī poshāk honā paḌtā hai

zamīñ pe ḳhāk-nashīnī kā vasf rakhte hue

kabhī kabhī hameñ aflāk honā paḌtā hai

agar maiñ Duubī use saath le ke Dūbūñgī

mohabbatoñ meñ bhī saffāk honā paḌtā hai

havā ke saath mohabbat ke dhūp-sahrā meñ

guloñ ko bhī ḳhas-o-ḳhāshāk honā paḌtā hai

bisāt-e-vaqt kī chāleñ samajh sakeñ 'rūhī'

kam-az-kam itnā to chālāk honā paḌtā hai

junun-e-ishq mein sad-chaak hona paDta hai

is intiha ke liye KHak hona paDta hai

kisi se jab kabhi hum zindagi badalte hain

to phir badan ki bhi poshak hona paDta hai

zamin pe KHak-nashini ka wasf rakhte hue

kabhi kabhi hamein aflak hona paDta hai

agar main Dubi use sath le ke Dubungi

mohabbaton mein bhi saffak hona paDta hai

hawa ke sath mohabbat ke dhup-sahra mein

gulon ko bhi KHas-o-KHashak hona paDta hai

bisat-e-waqt ki chaalen samajh saken 'ruhi'

kam-az-kam itna to chaalak hona paDta hai