junun-e-shauq-e-mohabbat ki aagahi dena

junūn-e-shauq-e-mohabbat kī āgahī denā

ḳhudī bhī jis pe ho qurbāñ vo be-ḳhudī denā

na shor chāhiye dariyā kī tund maujoñ kā

mire lahū ko samundar kī ḳhāmushī denā

tū de na de mire lab ko shaguftagī gul kī

jo de sake to shagūfe kī bekalī denā

shanāḳht jis se zamāne meñ aadmī kī hai

ye iltijā hai ki tū mujh ko vo ḳhudī denā

jhukā sake na mirā sar koī bhī qadmoñ par

jo ho sake to mujhe tū vo sar-kashī denā

naqāb ulaT de jo baḌh kar ruḳh-e-tamannā se

ye aarzū hai ki mujh ko vo tishnagī denā

na.ī jihāt se fan ko jo āshnā kar de

mire qalam ko ḳhudāyā vo kaj-ravī denā

junun-e-shauq-e-mohabbat ki aagahi dena

KHudi bhi jis pe ho qurban wo be-KHudi dena

na shor chahiye dariya ki tund maujon ka

mere lahu ko samundar ki KHamushi dena

tu de na de mere lab ko shaguftagi gul ki

jo de sake to shagufe ki bekali dena

shanaKHt jis se zamane mein aadmi ki hai

ye iltija hai ki tu mujh ko wo KHudi dena

jhuka sake na mera sar koi bhi qadmon par

jo ho sake to mujhe tu wo sar-kashi dena

naqab ulaT de jo baDh kar ruKH-e-tamanna se

ye aarzu hai ki mujh ko wo tishnagi dena

nai jihat se fan ko jo aashna kar de

mere qalam ko KHudaya wo kaj-rawi dena