junun-e-shauq meri hasraton se kam kyon ho

junūn-e-shauq mirī hasratoñ se kam kyoñ ho

vafā kī raah meñ ye laġhzish-e-qadam kyoñ ho

kisī kī chashm hī be-āb hai to nam kyoñ ho

nahīñ hai lazzat-e-ehsās-e-ġham to ġham kyoñ ho

kamāl-e-husn haiñ rusvā.iyāñ mohabbat kī

rahīn-e-bul-havasī ishq kā bharam kyoñ ho

sitam-rasīda-e-daurāñ bahut haiñ duniyā meñ

mire hī haal pe ye bārish-e-karam kyoñ ho

hazār ḳhūgar-e-ijz-o-niyāz huuñ lekin

sar-e-niyāz har ik āstāñ pe ḳham kyoñ ho

ba-qadr-e-zauq-e-talab mai atā ho rindoñ ko

ye mai-kada hai yahāñ rasm-e-besh-o-kam kyoñ ho

har ek chehra-e-gul-rang par khilā huuñ 'majīd'

to phir lahū se mirī dāstāñ raqam kyoñ ho

junun-e-shauq meri hasraton se kam kyon ho

wafa ki rah mein ye laghzish-e-qadam kyon ho

kisi ki chashm hi be-ab hai to nam kyon ho

nahin hai lazzat-e-ehsas-e-gham to gham kyon ho

kamal-e-husn hain ruswaiyan mohabbat ki

rahin-e-bul-hawasi ishq ka bharam kyon ho

sitam-rasida-e-dauran bahut hain duniya mein

mere hi haal pe ye barish-e-karam kyon ho

hazar KHugar-e-ijz-o-niyaz hun lekin

sar-e-niyaz har ek aastan pe KHam kyon ho

ba-qadr-e-zauq-e-talab mai ata ho rindon ko

ye mai-kada hai yahan rasm-e-besh-o-kam kyon ho

har ek chehra-e-gul-rang par khila hun 'majid'

to phir lahu se meri dastan raqam kyon ho