جنوں ہی کے علمبردار تھے ہم

جنوں ہی کے علمبردار تھے ہم

سو دنیا کے لیے بے کار تھے ہم

کسی کی راہ میں حائل ہوئے تھے

کسی کو سایۂ دیوار تھے ہم

پہنچ میں تھے ہماری چاند سورج

مگر جگنو کے پیروکار تھے ہم

ہمیں تقریر کرنا بھی تھا لازم

اور اس پر صاحب کردار تھے ہم

بغاوت تو ہمارے خون میں تھی

کہ اک جرأت کی پیداوار تھے ہم

اذان عشق ہوتی تھی جہاں سے

اسی مسجد کی اک مینار تھے ہم

تری قربت ہمیں حاصل نہیں تھی

تری فرقت کے تو حق دار تھے ہم

مخالف ہو گئے ناراض تو کیا

نتیجہ کے لیے تیار تھے ہم