junun josh-e-amal hai kar naya is mein asar paida

junūñ josh-e-amal hai kar nayā is meñ asar paidā

na.e farhād-o-teshe hoñ na.e koh-o-kamar paidā

ba-juz ilm-o-yaqīñ hotī nahīñ fikr-o-nazar paidā

kahāñ Thahre hue paanī meñ hotī hai lahar paidā

riyāz-o-saḳht-koshī ne kiye haiñ dīda-var paidā

sadaf ḳhūn-e-jigar se apne kartī hai guhar paidā

jahālat ke uTheñ parde to ho ilm-o-hunar paidā

qabā ho chaak zulmat kī to ho nūr-e-sahar paidā

qadam uThThā to phir hone lage ḳhud ham-safar paidā

kiye phir dasht-o-sahrā ne hazāroñ rahguzar paidā

tū hī raḳht-e-safar ko bāñdh kar aage nahīñ baḌhtā

zamāna roz kartā hai na.ī dekho sahar paidā

hameñ bardāsht karnā haiñ kahāñ tak zulmateñ aisī

chalo apne kareñ ham ab na.e shams-o-qamar paidā

chaTānoñ se jo Takrā kar nayā rasta banātā hai

kabhī aisā bhī hotā hai koī āshufta-sar paidā

koī suntā nahīñ hai nāla-o-shevan asīroñ kā

jo himmat ho to kar dīvār-e-zindāñ meñ tū dar paidā

agar ḳhūn-e-jigar se ābyārī kar sako yaaro

hue haiñ ḳhushk shāḳhoñ se bhī ġhunche aur samar paidā

sukūt-e-lāla-o-gul se rahe sunsān vo kitne

sadā-e-tesha ne kī raunaq-e-koh-o-kamar paidā

baḌī thī ḳhvāb-āvar vo fazā apne aqīdoñ kī

huā hai be-yaqīnī se nayā saudā-e-sar paidā

bahāreñ rang-o-bū ke tajziye se ab pareshāñ haiñ

chaman meñ ho ga.e haiñ aaj kitne dīda-var paidā

junun josh-e-amal hai kar naya is mein asar paida

nae farhad-o-teshe hon nae koh-o-kamar paida

ba-juz ilm-o-yaqin hoti nahin fikr-o-nazar paida

kahan Thahre hue pani mein hoti hai lahar paida

riyaz-o-saKHt-koshi ne kiye hain dida-war paida

sadaf KHun-e-jigar se apne karti hai guhar paida

jahaalat ke uThen parde to ho ilm-o-hunar paida

qaba ho chaak zulmat ki to ho nur-e-sahar paida

qadam uThTha to phir hone lage KHud ham-safar paida

kiye phir dasht-o-sahra ne hazaron rahguzar paida

tu hi raKHt-e-safar ko bandh kar aage nahin baDhta

zamana roz karta hai nai dekho sahar paida

hamein bardasht karna hain kahan tak zulmaten aisi

chalo apne karen hum ab nae shams-o-qamar paida

chaTanon se jo Takra kar naya rasta banata hai

kabhi aisa bhi hota hai koi aashufta-sar paida

koi sunta nahin hai nala-o-shewan asiron ka

jo himmat ho to kar diwar-e-zindan mein tu dar paida

agar KHun-e-jigar se aabyari kar sako yaro

hue hain KHushk shaKHon se bhi ghunche aur samar paida

sukut-e-lala-o-gul se rahe sunsan wo kitne

sada-e-tesha ne ki raunaq-e-koh-o-kamar paida

baDi thi KHwab-awar wo faza apne aqidon ki

hua hai be-yaqini se naya sauda-e-sar paida

bahaaren rang-o-bu ke tajziye se ab pareshan hain

chaman mein ho gae hain aaj kitne dida-war paida