junun ke dasht mein niklen wafa ki had kar den

junūñ ke dasht meñ nikleñ vafā kī had kar deñ

uThā ke eḌiyāñ apnī darāz qad kar deñ

mohabbatoñ ke chaman phir se lahlahā.eñge

ye nafratoñ ke sabhī baab qaid-e-had kar deñ

tumhāre hijr ke mausam jinheñ mayassar huuñ

vo barg-o-bar kī bahāroñ ko mustarad kar deñ

jo ehtimām-e-baġhāvat kā pesh-ḳhema huuñ

ḳhulūs-e-dil se vo zulmat ke baab sad kar deñ

nigāh-e-nāz se dekheñ to bahr-e-āzādī

qafas ke saare parindoñ ko nām-zad kar deñ

agar huuñ rishte ujāloñ se mo'atabar phir to

charāġh baḌh ke añdheroñ kī ḳhud madad kar deñ

hamāre shahr meñ aise bhī log haiñ 'anjum'

vo jis ko dekh leñ us ko hī mustanad kar deñ

junun ke dasht mein niklen wafa ki had kar den

uTha ke eDiyan apni daraaz qad kar den

mohabbaton ke chaman phir se lahlahaenge

ye nafraton ke sabhi bab qaid-e-had kar den

tumhaare hijr ke mausam jinhen mayassar hun

wo barg-o-bar ki bahaaron ko mustarad kar den

jo ehtimam-e-baghawat ka pesh-KHema hun

KHulus-e-dil se wo zulmat ke bab sad kar den

nigah-e-naz se dekhen to bahr-e-azadi

qafas ke sare parindon ko nam-zad kar den

agar hun rishte ujalon se mo'atabar phir to

charagh baDh ke andheron ki KHud madad kar den

hamare shahr mein aise bhi log hain 'anjum'

wo jis ko dekh len us ko hi mustanad kar den