junun ke josh mein jis ne mohabbat ko hunar jaana

junūñ ke josh meñ jis ne mohabbat ko hunar jaanā

subukdoshī samajhtā hai vo is saudā meñ sar jaanā

kisī kā naaz thā andāz thā ab sar-ba-sar jaanā

udhar chaḌhnā nigāhoñ meñ idhar dil meñ utar jaanā

tasavvur ḳhāl-o-āriz kā tamāshā-e-do-ālam hai

yahāñ āñkhoñ meñ rahnā hai vahāñ dil meñ utar jaanā

junūn-e-ishq meñ kab tan-badan kā hosh rahtā hai

baḌhā jab josh-e-saudā ham ne sar ko dard-e-sar jaanā

havas-bāzī nahīñ ye ishq-bāzī hai ḳhudā shāhid

mohabbat meñ hai shart-e-avvalīñ jī se guzar jaanā

miTā.ī apnī hastī ham ne ishq-e-jān-e-jānāñ meñ

fanā meñ dekh kar rañg-e-baqā ko mo'tabar jaanā

sarāpā-e-vafā ik zinda-e-jāved o be-ġham hai

takalluf-bartaraf ġham kyā hai jiinā aur mar jaanā

hamārī umr kā paimāna ab labrez hai 'sāhir'

chhalaknā farz ho jaatā hai paimāne kā bhar jaanā

junun ke josh mein jis ne mohabbat ko hunar jaana

subukdoshi samajhta hai wo is sauda mein sar jaana

kisi ka naz tha andaz tha ab sar-ba-sar jaana

udhar chaDhna nigahon mein idhar dil mein utar jaana

tasawwur KHal-o-ariz ka tamasha-e-do-alam hai

yahan aankhon mein rahna hai wahan dil mein utar jaana

junun-e-ishq mein kab tan-badan ka hosh rahta hai

baDha jab josh-e-sauda hum ne sar ko dard-e-sar jaana

hawas-bazi nahin ye ishq-bazi hai KHuda shahid

mohabbat mein hai shart-e-awwalin ji se guzar jaana

miTai apni hasti hum ne ishq-e-jaan-e-jaanan mein

fana mein dekh kar rang-e-baqa ko mo'tabar jaana

sarapa-e-wafa ek zinda-e-jawed o be-gham hai

takalluf-bartaraf gham kya hai jina aur mar jaana

hamari umr ka paimana ab labrez hai 'sahir'

chhalakna farz ho jata hai paimane ka bhar jaana