junun KHud-numa KHud-nigar bhi nahin

junūñ ḳhud-numā ḳhud-nigar bhī nahīñ

ḳhirad kī tarah kam-nazar bhī nahīñ

koī rāhzan kā ḳhatar bhī nahīñ

ki dāman meñ gard-e-safar bhī nahīñ

yahāñ hosh-o-īmāñ sabhī luT ga.e

mazā ye hai un kī ḳhabar bhī nahīñ

ġham-e-zindagī ik musalsal azaab

ġham-e-zindagī se mafar bhī nahīñ

nazar mo'atabar hai ḳhabar mo'atabar

magar is qadar mo'atabar bhī nahīñ

tirī anjuman markaz-e-ārzū

tirī anjuman meñ guzar bhī nahīñ

kahāñ jaa.eñ 'tābāñ' gunahgār-e-shauq

sazā bhī nahīñ darguzar bhī nahīñ

junun KHud-numa KHud-nigar bhi nahin

KHirad ki tarah kam-nazar bhi nahin

koi rahzan ka KHatar bhi nahin

ki daman mein gard-e-safar bhi nahin

yahan hosh-o-iman sabhi luT gae

maza ye hai un ki KHabar bhi nahin

gham-e-zindagi ek musalsal azab

gham-e-zindagi se mafar bhi nahin

nazar mo'atabar hai KHabar mo'atabar

magar is qadar mo'atabar bhi nahin

teri anjuman markaz-e-arzu

teri anjuman mein guzar bhi nahin

kahan jaen 'taban' gunahgar-e-shauq

saza bhi nahin darguzar bhi nahin