junun mein dhyan se aaKHir phisal gai koi shai

junūñ meñ dhyān se āḳhir phisal ga.ī koī shai

na jaane kis kī duā se sambhal ga.ī koī shai

abhī abhī mirī āñkhoñ meñ kuchh dhuāñ sā uThā

abhī abhī mire siine meñ jal ga.ī koī shai

bahut sambhāl ke rakhne kī ham ne koshish kī

hamāre haath se phir bhī nikal ga.ī koī shai

maiñ jab bhī dekhtā huuñ zindagī kā pichhlā varaq

to aisā lagtā hai dil meñ kuchal ga.ī koī shai

hamārī zindagī garche thī muntashir pahle

jo vaqt aayā to sāñche meñ Dhal ga.ī koī shai

na koī zauq-e-tamāshā na koī rañg-e-hayāt

zarūratoñ ke bahāne badal ga.ī koī shai

junun mein dhyan se aaKHir phisal gai koi shai

na jaane kis ki dua se sambhal gai koi shai

abhi abhi meri aankhon mein kuchh dhuan sa uTha

abhi abhi mere sine mein jal gai koi shai

bahut sambhaal ke rakhne ki hum ne koshish ki

hamare hath se phir bhi nikal gai koi shai

main jab bhi dekhta hun zindagi ka pichhla waraq

to aisa lagta hai dil mein kuchal gai koi shai

hamari zindagi garche thi muntashir pahle

jo waqt aaya to sanche mein Dhal gai koi shai

na koi zauq-e-tamasha na koi rang-e-hayat

zaruraton ke bahane badal gai koi shai