junun mera be-hisab hai kya

junūñ mirā be-hisāb hai kyā

maiñ dekhūñ terā 'itāb hai kyā

mujhe nigāhoñ se paḌh rahe ho

vujūd merā kitāb hai kyā

hamāre atrāf titliyāñ haiñ

hamārā lahja gulāb hai kyā

yahāñ ke pokhar khañgālte ho

samundaroñ kā hisāb hai kyā

jo zulm karnā gunāh Thahrā

to zulm sahnā savāb hai kyā

haqīr nazroñ se ham ko dekho

tumhārī āñkhoñ meñ taab hai kyā

maiñ sochā kartā huuñ ḳhalvatoñ meñ

vo dastaras dastyāb hai kyā

phir aane vaalī haiñ bārisheñ bhī

hamāre chhappar meñ taab hai kyā

fazā meñ ik ḳhāmushī hai taarī

phir aane ko inqalāb hai kyā

kyoñ itne likes mil rahe haiñ

ġhazal mirī lā-javāb hai kyā

junun mera be-hisab hai kya

main dekhun tera 'itab hai kya

mujhe nigahon se paDh rahe ho

wujud mera kitab hai kya

hamare atraf titliyan hain

hamara lahja gulab hai kya

yahan ke pokhar khangalte ho

samundaron ka hisab hai kya

jo zulm karna gunah Thahra

to zulm sahna sawab hai kya

haqir nazron se hum ko dekho

tumhaari aankhon mein tab hai kya

main socha karta hun KHalwaton mein

wo dastaras dastyab hai kya

phir aane wali hain barishen bhi

hamare chhappar mein tab hai kya

faza mein ek KHamushi hai tari

phir aane ko inqalab hai kya

kyon itne likes mil rahe hain

ghazal meri la-jawab hai kya