junun pe chhoD di ab sari zindagi maine

junūñ pe chhoḌ dī ab saarī zindagī maiñ ne

ḳhirad ko aag lagā dī abhī abhī maiñ ne

faqīr-e-shahr ke shajre ko dekhne ke ba.ad

amīr-e-shahr kī dastār khīñch lī maiñ ne

havā.eñ itnī ḳhunuk thiiñ ke ḳhuun jamne lagā

to tapte sehra kī kuchh ret oḌh lī maiñ ne

tilism TuuTā parinde se shāhzādī banī

jo sar meñ kiil Thukī thī nikāl dī maiñ ne

guzārishoñ ko na maano magar ye yaad rakho

ka.ī sunā.e haiñ farmān-e-tuġhlaqī maiñ ne

bunī ga.ī thī jo ḳhvāhish ke tāne-bāne se

mazār-e-dil se vo chādar utaar dī maiñ ne

mire charāġhoñ vasiyyat to dekh lo merī

tumhāre hisse meñ likh dī hai raushnī maiñ ne

'navāz' is liye rahtā hai vo ḳhafā mujh se

ke us kī baat pe haamī nahīñ bharī maiñ ne

junun pe chhoD di ab sari zindagi main ne

KHirad ko aag laga di abhi abhi main ne

faqir-e-shahr ke shajre ko dekhne ke baad

amir-e-shahr ki dastar khinch li main ne

hawaen itni KHunuk thin ke KHun jamne laga

to tapte sehra ki kuchh ret oDh li main ne

tilism TuTa parinde se shahzadi bani

jo sar mein kil Thuki thi nikal di main ne

guzarishon ko na mano magar ye yaad rakho

kai sunae hain farman-e-tughlaqi main ne

buni gai thi jo KHwahish ke tane-bane se

mazar-e-dil se wo chadar utar di main ne

mere charaghon wasiyyat to dekh lo meri

tumhaare hisse mein likh di hai raushni main ne

'nawaz' is liye rahta hai wo KHafa mujh se

ke us ki baat pe hami nahin bhari main ne