junun se barsar-e-paikar hoti ja rahi hai

junūñ se barsar-e-paikār hotī jā rahī hai

mirī dīvāngī hushiyār hotī jā rahī hai

kabhī mujh meñ koī buniyād-e-ġham rakkhī ga.ī thī

vo baḌh kar ab dar-o-dīvār hotī jā rahī hai

chhupā baiThā huuñ maiñ apne hī andar aur bāhar

na.ī duniyā koī tayyār hotī jā rahī hai

ḳhayāl aane lage haiñ dil meñ jaane kaise kaise

mirī tanhā.ī ab bāzār hotī jā rahī hai

maiñ ḳhud ko jis qadar āsān kartā jā rahā huuñ

ye duniyā us qadar dushvār hotī jā rahī hai

bahut din se nahīñ chīrā kisī chaTTān kā dil

salāhiyyat mirī bekār hotī jā rahī hai

maiñ duniyā kī nazar meñ mohtaram hone lagā huuñ

mirī nazroñ meñ duniyā ḳhaar hotī jā rahī hai

junun se barsar-e-paikar hoti ja rahi hai

meri diwangi hushiyar hoti ja rahi hai

kabhi mujh mein koi buniyaad-e-gham rakkhi gai thi

wo baDh kar ab dar-o-diwar hoti ja rahi hai

chhupa baiTha hun main apne hi andar aur bahar

nai duniya koi tayyar hoti ja rahi hai

KHayal aane lage hain dil mein jaane kaise kaise

meri tanhai ab bazar hoti ja rahi hai

main KHud ko jis qadar aasan karta ja raha hun

ye duniya us qadar dushwar hoti ja rahi hai

bahut din se nahin chira kisi chaTTan ka dil

salahiyyat meri bekar hoti ja rahi hai

main duniya ki nazar mein mohtaram hone laga hun

meri nazron mein duniya KHar hoti ja rahi hai