junun se rah-e-KHirad mein bhi kaam lena tha

junūñ se rāh-e-ḳhirad meñ bhī kaam lenā thā

har ek ḳhaar se izn-e-ḳhirām lenā thā

farāz-e-dār pe dāman kisī kā thaam liyā

junūn-e-shauq ko bhī intiqām lenā thā

hazār baar natā.ej se ho ke be-parvā

usī kā naam liyā jis kā naam lenā thā

ilāj-e-tishna-labī sahl thā magar saaqī

jo dast-e-ġhair meñ hai kab vo jaam lenā thā

junūñ kī raah meñ tadbīr-e-sarḳhushī ke liye

bas ek valvala-e-tez-gām lenā thā

shikasta laakh thī kashtī hazār thā tūfāñ

ḳhayāl meñ koī dāman to thaam lenā thā

nasīm ek ravish tak pahuñch ke tham sī ga.ī

ki nā-shagufta kalī kā payām lenā thā

shab-e-firāq meñ bhī kuchh diye chamakne lageñ

nigāh-e-shauq se itnā to kaam lenā thā

hazār baar tirī bazm meñ huā mahsūs

liyā jo ġhair ne mujh ko vo jaam lenā thā

maiñ ek jur.a-e-mastī pe sulh kyuuñ kartā

mujhe to jaam meñ māh-e-tamām lenā thā

ġhazab huā ki in āñkhoñ meñ ashk bhar aa.e

nigāh-e-yās se kuchh aur kaam lenā thā

kisī ne aag lagā.ī ho koī mujrim ho

hameñ to apne hī sar ittihām lenā thā

nigāh-e-shoḳh yahī fat.h aur kuchh hotī

jo gir rahe the unheñ baḌh ke thaam lenā thā

ye bazm-e-ḳhās kā aish-e-do-roza kyā hogā

ġham-e-avām se aish-e-davām lenā thā

junun se rah-e-KHirad mein bhi kaam lena tha

har ek KHar se izn-e-KHiram lena tha

faraaz-e-dar pe daman kisi ka tham liya

junun-e-shauq ko bhi intiqam lena tha

hazar bar nataej se ho ke be-parwa

usi ka nam liya jis ka nam lena tha

ilaj-e-tishna-labi sahl tha magar saqi

jo dast-e-ghair mein hai kab wo jam lena tha

junun ki rah mein tadbir-e-sarKHushi ke liye

bas ek walwala-e-tez-gam lena tha

shikasta lakh thi kashti hazar tha tufan

KHayal mein koi daman to tham lena tha

nasim ek rawish tak pahunch ke tham si gai

ki na-shagufta kali ka payam lena tha

shab-e-firaq mein bhi kuchh diye chamakne lagen

nigah-e-shauq se itna to kaam lena tha

hazar bar teri bazm mein hua mahsus

liya jo ghair ne mujh ko wo jam lena tha

main ek jura-e-masti pe sulh kyun karta

mujhe to jam mein mah-e-tamam lena tha

ghazab hua ki in aankhon mein ashk bhar aae

nigah-e-yas se kuchh aur kaam lena tha

kisi ne aag lagai ho koi mujrim ho

hamein to apne hi sar ittiham lena tha

nigah-e-shoKH yahi fath aur kuchh hoti

jo gir rahe the unhen baDh ke tham lena tha

ye bazm-e-KHas ka aish-e-do-roza kya hoga

gham-e-awam se aish-e-dawam lena tha