junun talash mein hai pa na le bahaar mujhe

junūñ talāsh meñ hai pā na le bahār mujhe

nadīm! ab na mire naam se pukār mujhe

surūr-e-bāda-e-nā-ḳhurda raqs-e-bazm-e-hayāt

bahut pasand hai ā.īn-e-intizār mujhe

phir aaj ham-safar-e-zindagī kahāñ huuñ maiñ

ye kaun raah bhulātā hai baar baar mujhe

zamāna-sāzī-e-ahbāb abhī nahīñ samjhā

samajh rahā huuñ zamāna hai sāzgār mujhe

suqūt-e-nabz ḳhabar hai sukūn-e-ḳhātir kī

ab aa chalā hai ab aa jā.egā qarār mujhe

go dostī na sahī dushmanī nibāh to dī

milā nasīb se dushman vafā-shi.ār mujhe

adam kā zinda namūna huuñ maiñ yahāñ 'nātiq'

vajūd maañg ke laayā hai musta.ār mujhe

junun talash mein hai pa na le bahaar mujhe

nadim! ab na mere nam se pukar mujhe

surur-e-baada-e-na-KHurda raqs-e-bazm-e-hayat

bahut pasand hai aain-e-intizar mujhe

phir aaj ham-safar-e-zindagi kahan hun main

ye kaun rah bhulata hai bar bar mujhe

zamana-sazi-e-ahbab abhi nahin samjha

samajh raha hun zamana hai sazgar mujhe

suqut-e-nabz KHabar hai sukun-e-KHatir ki

ab aa chala hai ab aa jaega qarar mujhe

go dosti na sahi dushmani nibah to di

mila nasib se dushman wafa-shiar mujhe

adam ka zinda namuna hun main yahan 'natiq'

wajud mang ke laya hai mustaar mujhe