junun to hai magar aao junun mein kho jaen

junūñ to hai magar aao junūñ meñ kho jaa.eñ

kisī ko apnā banā.eñ kisī ke ho jaa.eñ

jigar ke daaġh koī kam haiñ raushnī ke liye

maiñ jāgtā huuñ sitāroñ se kah do so jaa.eñ

tulū-e-sub.h ġham-e-zindagī ko zid ye hai

ki mere ḳhvāb ke lamhe ġhurūb ho jaa.eñ

ye sogvār safīna bhī rah ke kyā hogā

use bhī aa ke mire nāḳhudā Dubo jaa.eñ

sadī sadī ke ujāloñ se baat hotī hai

tire ḳhayāl ke maazī meñ kyuuñ na kho jaa.eñ

ham ahl-e-dard chaman meñ isī liye aa.e

ki āñsuoñ se zamīn-e-chaman bhigo jaa.eñ

kisī kī yaad meñ āñkheñ haiñ DabDabā.ī huī

'shamīm' bhiig chalī raat aao so jaa.eñ

junun to hai magar aao junun mein kho jaen

kisi ko apna banaen kisi ke ho jaen

jigar ke dagh koi kam hain raushni ke liye

main jagta hun sitaron se kah do so jaen

tulu-e-subh gham-e-zindagi ko zid ye hai

ki mere KHwab ke lamhe ghurub ho jaen

ye sogwar safina bhi rah ke kya hoga

use bhi aa ke mere naKHuda Dubo jaen

sadi sadi ke ujalon se baat hoti hai

tere KHayal ke mazi mein kyun na kho jaen

hum ahl-e-dard chaman mein isi liye aae

ki aansuon se zamin-e-chaman bhigo jaen

kisi ki yaad mein aankhen hain DabDabai hui

'shamim' bhig chali raat aao so jaen