jurat ai dil mai o mina hai wo KHud-kaam bhi hai

jur.at ai dil mai o miinā hai vo ḳhud-kām bhī hai

bazm aġhyār se ḳhālī bhī hai aur shaam bhī hai

zulf ke nīche ḳhat-e-sabz to dekhā hī na thā

ai lo ek aur nayā daam tah-e-dām bhī hai

chārāgar jaane de taklīf-e-mudāvā hai abas

maraz-e-ishq se hotā kahīñ ārām bhī hai

ho gayā aaj shab-e-hijr meñ ye qaul ġhalat

thā jo mash.hūr ki āġhāz ko anjām bhī hai

kām-e-jānāñ merā lab-e-yār ke bose se sivā

ḳhūgar-e-chāshni-e-lazzat-e-dushnām bhī hai

shaiḳh jī aap hī insāf se farmā.eñ bhalā

aur aalam meñ koī aisā bhī badnām bhī hai

zulf o ruḳh dair o haram shaam o sahar 'aish' in meñ

zulmat-e-kufr bhī hai jalva-e-islām bhī hai

jurat ai dil mai o mina hai wo KHud-kaam bhi hai

bazm aghyar se KHali bhi hai aur sham bhi hai

zulf ke niche KHat-e-sabz to dekha hi na tha

ai lo ek aur naya dam tah-e-dam bhi hai

chaaragar jaane de taklif-e-mudawa hai abas

maraz-e-ishq se hota kahin aaram bhi hai

ho gaya aaj shab-e-hijr mein ye qaul ghalat

tha jo mashhur ki aaghaz ko anjam bhi hai

kaam-e-jaanan mera lab-e-yar ke bose se siwa

KHugar-e-chashni-e-lazzat-e-dushnam bhi hai

shaiKH ji aap hi insaf se farmaen bhala

aur aalam mein koi aisa bhi badnam bhi hai

zulf o ruKH dair o haram sham o sahar 'aish' in mein

zulmat-e-kufr bhi hai jalwa-e-islam bhi hai