jurat ho to puchhe ye koi pir-e-mughan se

jur.at ho to pūchhe ye koī pīr-e-muġhāñ se

khiñchtī hai kahāñ aatī hai botal meñ kahāñ se

pachhtā.iyegā ham ko burā kah ke zabāñ se

TūTegā na vo tiir jo niklegā kahāñ se

ham baat bhī karte nahīñ us āfat-e-jāñ se

jo merī kahānī sune dushman kī zabāñ se

sargoshiyāñ kaisī haiñ zarā baḌh ke to dekho

qāsid to nahīñ aayā hai ḳhat le ke vahāñ se

āzādī ne baazū bhī salāmat nahīñ rakkhe

ai tāqat-e-parvāz tujhe laa.eñ kahāñ se

vo dekhiye phir jhūTī qasam aap ne khaa.ī

phir kah ga.e vo jo nahīñ kahnā thā zabāñ se

pahoñche ba-adab bārgah-e-nāz meñ terī

naale mire Takrā ke muazzin kī azaañ se

dushman kī kahānī to sadā sunte rahe aap

merī bhī kabhī sunte magar merī zabāñ se

ġhairat kā taqāza hai ki us bazm meñ chaliye

aur zo'f ye kahtā hai ki uTThe na yahāñ se

hañste jise dekhā use rote hue dekheñ

allāh dil aisā koī ab laa.eñ kahāñ se

ghabrā ke idhar aur udhar dekh rahe haiñ

pahuñchā ga.e ahbāb kahāñ ham ko kahāñ se

phūloñ meñ hañsī maiñ tirī pahchān rahā huuñ

tujh se nahīñ sīkhā hai to laa.e haiñ kahāñ se

mausam kā taqāzā hai ki pī lījiye 'bismil'

aur vaqt ye kahtā hai piyoge to kahāñ se

jurat ho to puchhe ye koi pir-e-mughan se

khinchti hai kahan aati hai botal mein kahan se

pachhtaiyega hum ko bura kah ke zaban se

TuTega na wo tir jo niklega kahan se

hum baat bhi karte nahin us aafat-e-jaan se

jo meri kahani sune dushman ki zaban se

sargoshiyan kaisi hain zara baDh ke to dekho

qasid to nahin aaya hai KHat le ke wahan se

aazadi ne bazu bhi salamat nahin rakkhe

ai taqat-e-parwaz tujhe laen kahan se

wo dekhiye phir jhuTi qasam aap ne khai

phir kah gae wo jo nahin kahna tha zaban se

pahonche ba-adab bargah-e-naz mein teri

nale mere Takra ke muazzin ki azan se

dushman ki kahani to sada sunte rahe aap

meri bhi kabhi sunte magar meri zaban se

ghairat ka taqaza hai ki us bazm mein chaliye

aur zo'f ye kahta hai ki uTThe na yahan se

hanste jise dekha use rote hue dekhen

allah dil aisa koi ab laen kahan se

ghabra ke idhar aur udhar dekh rahe hain

pahuncha gae ahbab kahan hum ko kahan se

phulon mein hansi main teri pahchan raha hun

tujh se nahin sikha hai to lae hain kahan se

mausam ka taqaza hai ki pi lijiye 'bismil'

aur waqt ye kahta hai piyoge to kahan se