jurm-e-wafa ki KHub saza de gaya mujhe

jurm-e-vafā kī ḳhuub sazā de gayā mujhe

ik lambī zindagī kī duā de gayā mujhe

zaḳhmoñ pe mere us ne namak tak chhiḌak diyā

dard-e-jigar kī ḳhuub davā de gayā mujhe

āñkhoñ meñ ashk merī vo bhar kar chalā gayā

merī vafā kā ḳhuub sila de gayā mujhe

us ne sukūn kab mujhe baḳhshā hai aaj tak

bholī tasalliyoñ kā nasha de gayā mujhe

jis ko bhī dost maiñ ne sharīk-e-safar kiyā

har ik qadam pe vo hī daġhā de gayā mujhe

ai dost raah chalte milā jo faqīr aaj

vo merī zindagī kā patā de gayā mujhe

āñkhoñ meñ ashk siine meñ rahne lagā thā dard

sun lī ḳhudā ne aaj qazā de gayā mujhe

maiñ ne hayāt jis kī sañvārī thī ai mukesh

vo hī ġhamoñ kī garm havā de gayā mujhe

jurm-e-wafa ki KHub saza de gaya mujhe

ek lambi zindagi ki dua de gaya mujhe

zaKHmon pe mere us ne namak tak chhiDak diya

dard-e-jigar ki KHub dawa de gaya mujhe

aankhon mein ashk meri wo bhar kar chala gaya

meri wafa ka KHub sila de gaya mujhe

us ne sukun kab mujhe baKHsha hai aaj tak

bholi tasalliyon ka nasha de gaya mujhe

jis ko bhi dost main ne sharik-e-safar kiya

har ek qadam pe wo hi dagha de gaya mujhe

ai dost rah chalte mila jo faqir aaj

wo meri zindagi ka pata de gaya mujhe

aankhon mein ashk sine mein rahne laga tha dard

sun li KHuda ne aaj qaza de gaya mujhe

main ne hayat jis ki sanwari thi ai mukesh

wo hi ghamon ki garm hawa de gaya mujhe