justuju manzil-e-idrak se wabasta hai

justujū manzil-e-idrāk se vābasta hai

ḳhāk-e-darvesh abhī chaak se vābasta hai

merī fitrat nahīñ maiñ ġhair ke raste pe chalūñ

merī nisbat bhī merī naak se vābasta hai

vo jo aa.ī thī mire sā.īñ ke qadmoñ ke tale

merī hastī to isī ḳhaak se vābasta hai

tū kabhī ruuh se insāf nahīñ kar saktā

terī darveshī to poshāk se vābasta hai

taḳhta-e-dār pe chaḌh jā.egī sach kī ḳhātir

ye zabāñ lahja-e-bebāk se vābasta hai

hosh vaalo ko ye hāsil nahīñ hotī hai miyāñ

ye ḳhushī dīda-e-namnāk se vābasta hai

ham zamīñ par nahīñ chalte kabhī tan kar 'tāriq'

dil yahāñ hai magar aflāk se vābasta hai

justuju manzil-e-idrak se wabasta hai

KHak-e-darwesh abhi chaak se wabasta hai

meri fitrat nahin main ghair ke raste pe chalun

meri nisbat bhi meri nak se wabasta hai

wo jo aai thi mere sain ke qadmon ke tale

meri hasti to isi KHak se wabasta hai

tu kabhi ruh se insaf nahin kar sakta

teri darweshi to poshak se wabasta hai

taKHta-e-dar pe chaDh jaegi sach ki KHatir

ye zaban lahja-e-bebak se wabasta hai

hosh walo ko ye hasil nahin hoti hai miyan

ye KHushi dida-e-namnak se wabasta hai

hum zamin par nahin chalte kabhi tan kar 'tariq'

dil yahan hai magar aflak se wabasta hai