justuju se KHuda mila ki nahin

justujū se ḳhudā milā ki nahīñ

tujh pe dar sātvāñ khulā ki nahīñ

kyā kahā paañv ghis ga.e tere

soch ne bhī safar kiyā ki nahīñ

terī ḳhātir badan jalā baiThe

phir bhī terā diyā jalā ki nahīñ

log lākhoñ parakh liye tum ne

mere jaisā koī milā ki nahīñ

sab ne pūchhā to thā mirā lekin

zikr us ne mirā kiyā ki nahīñ

maiñ jo choTī meñ gūñdh laa.ī thī

phuul collar pe vo khilā ki nahīñ

tere kahne pe pahnā surḳh libās

ab batā mujh pe ye sajā ki nahīñ

ishq sho.ala hai ye jalā degā

merā kahnā ye sach huā ki nahīñ

mil na paa.ī tujhe 'samīna' to

zindagī par asar paḌā ki nahīñ

justuju se KHuda mila ki nahin

tujh pe dar satwan khula ki nahin

kya kaha panw ghis gae tere

soch ne bhi safar kiya ki nahin

teri KHatir badan jala baiThe

phir bhi tera diya jala ki nahin

log lakhon parakh liye tum ne

mere jaisa koi mila ki nahin

sab ne puchha to tha mera lekin

zikr us ne mera kiya ki nahin

main jo choTi mein gundh lai thi

phul collar pe wo khila ki nahin

tere kahne pe pahna surKH libas

ab bata mujh pe ye saja ki nahin

ishq shoala hai ye jala dega

mera kahna ye sach hua ki nahin

mil na pai tujhe 'samina' to

zindagi par asar paDa ki nahin