ju-e-taza kisi kohsar-e-kuhan se aae

jū-e-tāza kisī kohsār-e-kuhan se aa.e

ye hunar yuuñ nahīñ aatā hai jatan se aa.e

log nāzuk the aur ehsās ke vīrāne tak

vo guzarte hue āñkhoñ kī jalan se aa.e

shahr-e-gul kāsa-e-darvesh banā baiThā hai

koī sho.ala kisī jalte hue ban se aa.e

dard kī mauj-e-subuk-sair meñ bah jā.ūñgā

chāhe vo jaan se chāhe vo badan se aa.e

sub.h ke saath ajab lazzat-e-daryūza-garī

rāt-bhar sochte rahne kī thakan se aa.e

aise zālim haiñ mire dost ki sunte hī nahīñ

jab talak ḳhuun kī ḳhushbū na suḳhan se aa.e

ju-e-taza kisi kohsar-e-kuhan se aae

ye hunar yun nahin aata hai jatan se aae

log nazuk the aur ehsas ke virane tak

wo guzarte hue aankhon ki jalan se aae

shahr-e-gul kasa-e-darwesh bana baiTha hai

koi shoala kisi jalte hue ban se aae

dard ki mauj-e-subuk-sair mein bah jaunga

chahe wo jaan se chahe wo badan se aae

subh ke sath ajab lazzat-e-daryuza-gari

raat-bhar sochte rahne ki thakan se aae

aise zalim hain mere dost ki sunte hi nahin

jab talak KHun ki KHushbu na suKHan se aae