jun bhi jo rengne nahin deti thi kan par

juuñ bhī jo reñgne nahīñ detī thī kaan par

kālak lagā ke chhoḌ ga.ī ḳhāndān par

maa.il haiñ zehn-o-fikr jo ūñchī uḌaan par

yuuñ paañv haiñ zamīñ pe nazar āsmān par

ārām se haiñ ūñchī imārāt ke makīñ

patthar baras rahe haiñ shikasta-makān par

arzāñ-farosh par nahīñ uThtī nazar koī

rahtī hai bhiiḌ shahr kī mahñgī dukān par

jaise badan meñ jaan hī baaqī nahīñ rahī

mahsūs ho rahā hai safar kī takān par

biphre samundaroñ pe barastā chalā gayā

aayā na abr dhuup meñ tapte makān par

dil reza reza hai to jigar hai lahū lahū

kaisī banī huī hai mohabbat kī jaan par

haañ rahravo milegī tumheñ manzil-e-hayāt

chalte raho hamāre qadam ke nishān par

ḳhuddarī-e-jamāl gavārā na kar sakī

us ne masal ke pheñk diyā phuul lawn par

'bāġhī' bhaTak rahā huuñ maiñ sahrā-e-shauq meñ

kyā naqsh us ne likh ke khilāyā thā paan par

jun bhi jo rengne nahin deti thi kan par

kalak laga ke chhoD gai KHandan par

mail hain zehn-o-fikr jo unchi uDan par

yun panw hain zamin pe nazar aasman par

aaram se hain unchi imaraat ke makin

patthar baras rahe hain shikasta-makan par

arzan-farosh par nahin uThti nazar koi

rahti hai bhiD shahr ki mahngi dukan par

jaise badan mein jaan hi baqi nahin rahi

mahsus ho raha hai safar ki takan par

biphre samundaron pe barasta chala gaya

aaya na abr dhup mein tapte makan par

dil reza reza hai to jigar hai lahu lahu

kaisi bani hui hai mohabbat ki jaan par

han rahrawo milegi tumhein manzil-e-hayat

chalte raho hamare qadam ke nishan par

KHuddari-e-jamal gawara na kar saki

us ne masal ke phenk diya phul lawn par

'baghi' bhaTak raha hun main sahra-e-shauq mein

kya naqsh us ne likh ke khilaya tha pan par