jun shama dam-e-subh main yan se safari hun

juuñ sham.a dam-e-sub.h maiñ yaañ se safarī huuñ

Tuk muntazir-e-jumbish-e-bād-e-saharī huuñ

ne girya-e-shab huuñ maiñ na āh-e-saharī huuñ

juuñ bāñg-e-jaras ham-nafas-e-be-asarī hoñ

jaatā huuñ maiñ jīdhar ko vo muñh phere hai mujh se

goyā ki maiñ gard-e-qadam-e-rah-guzrī huuñ

dekhā na maiñ juz-sāya-e-bāzū-e-shikasta

hirmāñ-zada juuñ hasrat-e-be-bāl-o-parī huuñ

maiñ pairahan apne maiñ samātā nahīñ juuñ gul

jis vaqt se āmāda pa.e-jāma-darī huuñ

sau ḳhizr se kam-hausla vaañ jī se ga.e haiñ

jis dasht-e-ḳhatarnāk kā maiñ rah-guzrī huuñ

juuñ sard rakhā sañg-e-jafā se mujhe āzād

marhūn tirā jī se maiñ ai be-samarī huuñ

kyā kam huuñ sikandar se agar dekhiye mujh ko

ā.īna-sifat mālik-e-ḳhushkī-o-tarī huuñ

kis bazm meñ dekhī hai vo jhamkī ki maiñ 'qā.em'

juuñ sham.a sadā mahv-e-pareshāñ-nazarī huuñ

jun shama dam-e-subh main yan se safari hun

Tuk muntazir-e-jumbish-e-baad-e-sahari hun

ne girya-e-shab hun main na aah-e-sahari hun

jun bang-e-jaras ham-nafas-e-be-asari hon

jata hun main jidhar ko wo munh phere hai mujh se

goya ki main gard-e-qadam-e-rah-guzri hun

dekha na main juz-saya-e-bazu-e-shikasta

hirman-zada jun hasrat-e-be-baal-o-pari hun

main pairahan apne main samata nahin jun gul

jis waqt se aamada pae-jama-dari hun

sau KHizr se kam-hausla wan ji se gae hain

jis dasht-e-KHatarnak ka main rah-guzri hun

jun sard rakha sang-e-jafa se mujhe aazad

marhun tera ji se main ai be-samari hun

kya kam hun sikandar se agar dekhiye mujh ko

aaina-sifat malik-e-KHushki-o-tari hun

kis bazm mein dekhi hai wo jhamki ki main 'qaem'

jun shama sada mahw-e-pareshan-nazari hun