juyan-e-taza-kari-e-guftar kuchh kaho

jūyān-e-tāza-kārī-e-guftār kuchh kaho

tum bhī hue ho kāshif-e-asrār kuchh kaho

shīsha kahīñ se laao sharāb-e-farañg kā

baaqī jo thī hikāyat-e-dildār kuchh kaho

jaane bhī do taġhayyur-e-ālam kī dāstāñ

kis haal meñ hai nargis-e-bīmār kuchh kaho

bādal uThe haiñ chashmak-e-barq-o-sharār hai

muñh dekhte ho sūrat-e-dīvār kuchh kaho

mutrib ko taaza bait sikhāo huā hai narm

guzre kisī tarah to shab-e-tār kuchh kaho

Thahrā huā hai vādi-e-ġham meñ ramīda vaqt

samjho bhī kuchh nazākat-e-bisyār kuchh kaho

zinda-dilān-e-shauq ne rakkhā bahār naam

ik mauj-e-ḳhūñ ga.ī sar-e-gulzār kuchh kaho

āġhāz har taġhayyur-e-ālam kī had huā

us kī galī kā sāya-e-dīvār kuchh kaho

uljhegā aaj jī ki havā pech pech hai

bantā nahīñ koī ruḳh-e-guftār kuchh kaho

juyan-e-taza-kari-e-guftar kuchh kaho

tum bhi hue ho kashif-e-asrar kuchh kaho

shisha kahin se lao sharab-e-farang ka

baqi jo thi hikayat-e-dildar kuchh kaho

jaane bhi do taghayyur-e-alam ki dastan

kis haal mein hai nargis-e-bimar kuchh kaho

baadal uThe hain chashmak-e-barq-o-sharar hai

munh dekhte ho surat-e-diwar kuchh kaho

mutrib ko taza bait sikhao hua hai narm

guzre kisi tarah to shab-e-tar kuchh kaho

Thahra hua hai wadi-e-gham mein ramida waqt

samjho bhi kuchh nazakat-e-bisyar kuchh kaho

zinda-dilan-e-shauq ne rakkha bahaar nam

ek mauj-e-KHun gai sar-e-gulzar kuchh kaho

aaghaz har taghayyur-e-alam ki had hua

us ki gali ka saya-e-diwar kuchh kaho

uljhega aaj ji ki hawa pech pech hai

banta nahin koi ruKH-e-guftar kuchh kaho