juz dida-e-tar naqsh banaya nahin jata

juz dīda-e-tar naqsh banāyā nahīñ jaatā

rang aur kahīñ mujh se jamāyā nahīñ jaatā

ab jaisā bhī anjām ho is kūza-garī kā

miTTī se magar haath chhuḌāyā nahīñ jaatā

ye dil to vo dil hai hameñ matlab nahīñ jis se

ye ghar to vo ghar hai jahāñ aayā nahīñ jaatā

ug aatī hai dīvār-e-ḳharābī sar-e-sahrā

ban jaatā hai ghar ḳhud hī banāyā nahīñ jaatā

dil rauzan-e-duniyā se nazar aa.e to aa.e

is mauj ko manzar pe to laayā nahīñ jaatā

vahshat kī hadeñ ḳhaak se miltī nahīñ afsos

ik dasht hai aur is meñ samāyā nahīñ jaatā

hamrāh-e-safar peḌ jo the rah ga.e pīchhe

jo saaya saroñ par thā vo saaya nahīñ jaatā

juz dida-e-tar naqsh banaya nahin jata

rang aur kahin mujh se jamaya nahin jata

ab jaisa bhi anjam ho is kuza-gari ka

miTTi se magar hath chhuDaya nahin jata

ye dil to wo dil hai hamein matlab nahin jis se

ye ghar to wo ghar hai jahan aaya nahin jata

ug aati hai diwar-e-KHarabi sar-e-sahra

ban jata hai ghar KHud hi banaya nahin jata

dil rauzan-e-duniya se nazar aae to aae

is mauj ko manzar pe to laya nahin jata

wahshat ki haden KHak se milti nahin afsos

ek dasht hai aur is mein samaya nahin jata

hamrah-e-safar peD jo the rah gae pichhe

jo saya saron par tha wo saya nahin jata