جز دیدۂ تر نقش بنایا نہیں جاتا

جز دیدۂ تر نقش بنایا نہیں جاتا

رنگ اور کہیں مجھ سے جمایا نہیں جاتا

اب جیسا بھی انجام ہو اس کوزہ گری کا

مٹی سے مگر ہاتھ چھڑایا نہیں جاتا

یہ دل تو وہ دل ہے ہمیں مطلب نہیں جس سے

یہ گھر تو وہ گھر ہے جہاں آیا نہیں جاتا

اگ آتی ہے دیوار خرابی سر صحرا

بن جاتا ہے گھر خود ہی بنایا نہیں جاتا

دل روزن دنیا سے نظر آئے تو آئے

اس موج کو منظر پہ تو لایا نہیں جاتا

وحشت کی حدیں خاک سے ملتی نہیں افسوس

اک دشت ہے اور اس میں سمایا نہیں جاتا

ہم راہ سفر پیڑ جو تھے رہ گئے پیچھے

جو سایہ سروں پر تھا وہ سایہ نہیں جاتا