juz KHuda aur koi hami-o-nasir mil jae

juz ḳhudā aur koī hāmī-o-nāsir mil jaa.e

lutf aa jaa.e qasam se jo vo kāfir mil jaa.e

us kī mushkil se maiñ vāqif huuñ yahī hai mushkil

ye bhī ab kah nahīñ saktā ki bazāhir mil jaa.e

ye vahī haiñ ki jinheñ faḳhr hai mismārī par

dil nahīñ to koī masjid koī mandir mil jaa.e

shahr ghabrā.e hue haiñ na.ī vīrānī se

dasht āvāz lagāte haiñ musāfir mil jaa.e

le kar aayā kahāñ sadiyoñ kā safar lā'nat hai

koh-e-nūr aaj bhī us kā jise nādir mil jaa.e

chain kī saañs na le pā.eñge sau saal bhī ham

haañ ba-sharte koī us se baḌā shātir mil jaa.e

juz KHuda aur koi hami-o-nasir mil jae

lutf aa jae qasam se jo wo kafir mil jae

us ki mushkil se main waqif hun yahi hai mushkil

ye bhi ab kah nahin sakta ki bazahir mil jae

ye wahi hain ki jinhen faKHr hai mismari par

dil nahin to koi masjid koi mandir mil jae

shahr ghabrae hue hain nai virani se

dasht aawaz lagate hain musafir mil jae

le kar aaya kahan sadiyon ka safar la'nat hai

koh-e-nur aaj bhi us ka jise nadir mil jae

chain ki sans na le paenge sau sal bhi hum

han ba-sharte koi us se baDa shatir mil jae