جز مرگ درد عشق سے کوئی مفر نہیں

جز مرگ درد عشق سے کوئی مفر نہیں

اس کے لئے دوا و دعا کارگر نہیں

کس درجہ پر خطر ہیں محبت کی منزلیں

اس پر یہ طرہ ہے کہ کوئی راہبر نہیں

تیر نگاہ ناز نے کیا کیا ستم کئے

مجروح دل نہیں کہ دو پارہ جگر نہیں

خود سے بھی بے خبر ہیں ترے انتظار میں

اور تیری یاد دل سے جدا لمحہ بھر نہیں

جس شے پہ کی نگاہ دکھائی دئے ہو تم

کیا ہے اگر یہ حسن فریب نظر نہیں

تم نے ہزار بار دئے ہیں ہمیں فریب

لیکن ہمارے عشق میں زیر و زبر نہیں

جوہرؔ لٹائی ہم نے تو کل کائنات زیست

لیکن اس آفت دل و جاں پر اثر نہیں