juz rishta-e-KHulus ye rishta kuchh aur tha

juz rishta-e-ḳhulūs ye rishta kuchh aur thā

tum mere aur kuchh maiñ tumhārā kuchh aur thā

jo ḳhvāb tum ne mujh ko sunāyā thā aur kuchh

ta.abīr kah rahī hai ki sapnā kuchh aur thā

ham-rāhiyoñ ko jashn manāne se thī ġharaz

manzil hanūz duur thī rasta kuchh aur thā

ummīd-o-bīm, ishrat-o-usrat ke darmiyāñ

ik kashmakash kuchh aur thii, kuchh thā kuchh aur thā

ham bhī the yuuñ to mahv-e-tamāshā-e-dahr par

dil meñ khaTak sī thī ki tamāshā kuchh aur thā

jo baat tum ne jaisī sunī Thiik hai vahī

maiñ kyā kahūñ ki yaar ye qissa kuchh aur thā

'ahmad' ġhazal kī apnī ravish apne taur haiñ

maiñ ne kahā kuchh aur hai sochā kuchh aur thā

juz rishta-e-KHulus ye rishta kuchh aur tha

tum mere aur kuchh main tumhaara kuchh aur tha

jo KHwab tum ne mujh ko sunaya tha aur kuchh

tabir kah rahi hai ki sapna kuchh aur tha

ham-rahiyon ko jashn manane se thi gharaz

manzil hanuz dur thi rasta kuchh aur tha

ummid-o-bim, ishrat-o-usrat ke darmiyan

ek kashmakash kuchh aur thi, kuchh tha kuchh aur tha

hum bhi the yun to mahw-e-tamasha-e-dahr par

dil mein khaTak si thi ki tamasha kuchh aur tha

jo baat tum ne jaisi suni Thik hai wahi

main kya kahun ki yar ye qissa kuchh aur tha

'ahmad' ghazal ki apni rawish apne taur hain

main ne kaha kuchh aur hai socha kuchh aur tha