kaba-e-ruKHsar ki tere ziyarat chahiye

ka.aba-e-ruḳhsār kī tere ziyārat chāhiye

mujh ko terā hausla terī ijāzat chāhiye

maiñ hamesha ye duā kartā huuñ ai parvardigār

mere beToñ ko bhī mujh jaisī saḳhāvat chāhiye

sard mausam kā sahā jaatā nahīñ mujh se azaab

barf jaisī raat ko terī harārat chāhiye

zindagī kā lutf hāsil is tarah hotā nahīñ

dil meñ tere jazba-e-sabr-o-qanā.at chāhiye

puurā yuuñ hī shahr qabristān jaisā ho gayā

zālimoñ ko aur kitnī ab halākat chāhiye

kausar-o-tasnīm to haiñ ahl-e-jannat ke liye

ai mire saaqī mujhe jām-e-shahādat chāhiye

jis kī har āvāz par har shaḳhs ham-āvāz ho

aaj apnī qaum ko aisī qayādat chāhiye

maiñ bhī basnā chāhtā huuñ aap hī ke shahr meñ

mujh ko is meñ ghar banāne kī ijāzat chāhiye

baat sach kahnā koī āsāñ nahīñ is daur meñ

lab hilāne kī sar-e-mahfil jasārat chāhiye

'shād' kyoñ us kā numā.inda maiñ tujh ko maan luuñ

us kā likkhā koī ḳhat us kī ibārat chāhiye

kaba-e-ruKHsar ki tere ziyarat chahiye

mujh ko tera hausla teri ijazat chahiye

main hamesha ye dua karta hun ai parwardigar

mere beTon ko bhi mujh jaisi saKHawat chahiye

sard mausam ka saha jata nahin mujh se azab

barf jaisi raat ko teri hararat chahiye

zindagi ka lutf hasil is tarah hota nahin

dil mein tere jazba-e-sabr-o-qanaat chahiye

pura yun hi shahr qabristan jaisa ho gaya

zalimon ko aur kitni ab halakat chahiye

kausar-o-tasnim to hain ahl-e-jannat ke liye

ai mere saqi mujhe jam-e-shahadat chahiye

jis ki har aawaz par har shaKHs ham-awaz ho

aaj apni qaum ko aisi qayaadat chahiye

main bhi basna chahta hun aap hi ke shahr mein

mujh ko is mein ghar banane ki ijazat chahiye

baat sach kahna koi aasan nahin is daur mein

lab hilane ki sar-e-mahfil jasarat chahiye

'shad' kyon us ka numainda main tujh ko man lun

us ka likkha koi KHat us ki ibarat chahiye