kaba nazar mein hai na hai but-KHana aaj-kal

ka.aba nazar meñ hai na hai but-ḳhāna āj-kal

rahtī hai garm mahfil-e-rindāna āj-kal

jo pārsā thā hai vahī mastāna āj-kal

kyā khul gayā hai phir dar-e-mai-ḳhāna āj-kal

ruktā nahīñ kahīñ tirā dīvāna āj-kal

qismat banī hai gardish-e-paimāna āj-kal

pahlī sī bazm-e-nāz rahī aur na soz-o-sāz

kyoñ DhūñDhtā hai sham.a ko parvāna āj-kal

mīnā-o-mai kī ḳhair ho jām-o-subū kī ḳhair

phir ho rahī hai laġhzish-e-mastāna āj-kal

aa.ī bahār josh kā sāmāñ liye hue

phir mastiyoñ meñ hai tirā dīvāna āj-kal

ġhurbat meñ pā rahā huuñ ajab lutf-e-zindagī

apnā nazar meñ hai na hai begāna āj-kal

kyā pūchhte ho 'zabt' kā maskan batā.eñ kyā

hai ik harīm-e-nāz meñ kāshāna āj-kal

kaba nazar mein hai na hai but-KHana aaj-kal

rahti hai garm mahfil-e-rindana aaj-kal

jo parsa tha hai wahi mastana aaj-kal

kya khul gaya hai phir dar-e-mai-KHana aaj-kal

rukta nahin kahin tera diwana aaj-kal

qismat bani hai gardish-e-paimana aaj-kal

pahli si bazm-e-naz rahi aur na soz-o-saz

kyon DhunDhta hai shama ko parwana aaj-kal

mina-o-mai ki KHair ho jam-o-subu ki KHair

phir ho rahi hai laghzish-e-mastana aaj-kal

aai bahaar josh ka saman liye hue

phir mastiyon mein hai tera diwana aaj-kal

ghurbat mein pa raha hun ajab lutf-e-zindagi

apna nazar mein hai na hai begana aaj-kal

kya puchhte ho 'zabt' ka maskan bataen kya

hai ek harim-e-naz mein kashana aaj-kal