kafir hue sanam hum din-dar teri KHatir

kāfir hue sanam ham dīñ-dār terī ḳhātir

tasbīh toḌ bāñdhā zunnār terī ḳhātir

gul sīna-chāk bulbul nālāñ chaman meñ dekhī

āñkhoñ ke dukh se nargis bīmār terī ḳhātir

abrū kī tū ishārat jis kī taraf kare thā

chaltī thī mujh meñ us meñ talvār terī ḳhātir

maiñ jhuuT sach bhī yak-dam aañsū na un ke poñchhe

jo chashm roz-o-shab haiñ ḳhūñ-bār terī ḳhātir

sab āshnāoñ se ham begāna ho rahe the

ab zindagī hai apnī dushvār terī ḳhātir

masjid meñ mai-kade meñ kyā kaifī aur suufī

behosh terī ḳhātir hoshyār terī ḳhātir

jo rāh-e-āshiqī meñ thī pastī-o-bulandī

vo ham ne kī sarāsar hamvār terī ḳhātir

pathrā ga.ī haiñ āñkheñ anjum kī tarah har shab

bedār rahte rahte ai yaar terī ḳhātir

is abr meñ chaman ne kyā kyā kiyā hai saaqī

asbāb mai-kashī kā tayyār terī ḳhātir

har ġhuncha hai gulābī har gul hai sāġhar-e-mai

mai-ḳhāna ho rahā hai gulzār terī ḳhātir

aage to kūcha-gardī sheva na thā 'muhib' kā

kī ab shurūa us ne nā-chār terī ḳhātir

kafir hue sanam hum din-dar teri KHatir

tasbih toD bandha zunnar teri KHatir

gul sina-chaak bulbul nalan chaman mein dekhi

aankhon ke dukh se nargis bimar teri KHatir

abru ki tu ishaarat jis ki taraf kare tha

chalti thi mujh mein us mein talwar teri KHatir

main jhuT sach bhi yak-dam aansu na un ke ponchhe

jo chashm roz-o-shab hain KHun-bar teri KHatir

sab aashnaon se hum begana ho rahe the

ab zindagi hai apni dushwar teri KHatir

masjid mein mai-kade mein kya kaifi aur sufi

behosh teri KHatir hoshyar teri KHatir

jo rah-e-ashiqi mein thi pasti-o-bulandi

wo hum ne ki sarasar hamwar teri KHatir

pathra gai hain aankhen anjum ki tarah har shab

bedar rahte rahte ai yar teri KHatir

is abr mein chaman ne kya kya kiya hai saqi

asbab mai-kashi ka tayyar teri KHatir

har ghuncha hai gulabi har gul hai saghar-e-mai

mai-KHana ho raha hai gulzar teri KHatir

aage to kucha-gardi shewa na tha 'muhib' ka

ki ab shurua us ne na-chaar teri KHatir