kafir hun gar kisi ko diwana jaanta hun

kāfir huuñ gar kisī ko dīvāna jāntā huuñ

ahvāl-e-qais kā bhī afsāna jāntā huuñ

ai shola-rū zabānī hai terī garm-joshī

maiñ ḳhuub rabt-e-sham-o-parvana jāntā huuñ

jām-e-sharāb kā maiñ kaahe ko multajī huuñ

āñkhoñ ko terī saaqī paimāna jāntā huuñ

kunj-e-qafas ko sauñpā roz-e-azal qazā ne

ne daam jāntā huuñ ne daana jāntā huuñ

rahtā huuñ mast har dam yād-e-nigah meñ us kī

kāfir huuñ gar maiñ rāh-e-mai-ḳhāna jāntā huuñ

tere kunisht se maiñ vāqif nahīñ barahman

apne harīm-e-dil ko but-ḳhāna jāntā huuñ

saudā-e-ishq jab se mujh ko huā hai 'joshish'

ābādī-e-jahāñ ko vīrāna jāntā huuñ

kafir hun gar kisi ko diwana jaanta hun

ahwal-e-qais ka bhi afsana jaanta hun

ai shola-ru zabani hai teri garm-joshi

main KHub rabt-e-sham-o-parwana jaanta hun

jam-e-sharab ka main kahe ko multaji hun

aankhon ko teri saqi paimana jaanta hun

kunj-e-qafas ko saunpa roz-e-azal qaza ne

ne dam jaanta hun ne dana jaanta hun

rahta hun mast har dam yaad-e-nigah mein us ki

kafir hun gar main rah-e-mai-KHana jaanta hun

tere kunisht se main waqif nahin barahman

apne harim-e-dil ko but-KHana jaanta hun

sauda-e-ishq jab se mujh ko hua hai 'joshish'

aabaadi-e-jahan ko virana jaanta hun