kafir hun sar-phira hun mujhe mar dijiye

kāfir huuñ sar-phirā huuñ mujhe maar dījiye

maiñ sochne lagā huuñ mujhe maar dījiye

hai ehtirām-e-hazrat-e-insān merā diin

be-dīn ho gayā huuñ mujhe maar dījiye

maiñ pūchhne lagā huuñ sabab apne qatl kā

maiñ had se baḌh gayā huuñ mujhe maar dījiye

kartā huuñ ahl-e-jubba-o-dastār se savāl

gustāḳh ho gayā huuñ mujhe maar dījiye

ḳhushbū se merā rabt hai jugnū se merā kaam

kitnā bhaTak gayā huuñ mujhe maar dījiye

ma.alūm hai mujhe ki baḌā jurm hai ye kaam

maiñ ḳhvāb dekhtā huuñ mujhe maar dījiye

zāhid ye zohd-o-taqvā-o-parhez kī ravish

maiñ ḳhuub jāntā huuñ mujhe maar dījiye

be-dīn huuñ magar haiñ zamāne meñ jitne diin

maiñ sab ko māntā huuñ mujhe maar dījiye

phir us ke ba.ad shahr meñ nāchegā hū kā shor

maiñ āḳhirī sadā huuñ mujhe maar dījiye

maiñ Thiik sochtā huuñ koī had mere liye

maiñ saaf dekhtā huuñ mujhe maar dījiye

ye zulm hai ki zulm ko kahtā huuñ saaf zulm

kyā zulm kar rahā huuñ mujhe maar dījiye

zinda rahā to kartā rahūñgā hamesha pyaar

maiñ saaf kah rahā huuñ mujhe maar dījiye

jo zaḳhm bāñTte haiñ unheñ ziist pe hai haq

maiñ phuul bāñTtā huuñ mujhe maar dījiye

bārūd kā nahīñ mirā maslak darūd hai

maiñ ḳhair māñgtā huuñ mujhe maar dījiye

kafir hun sar-phira hun mujhe mar dijiye

main sochne laga hun mujhe mar dijiye

hai ehtiram-e-hazrat-e-insan mera din

be-din ho gaya hun mujhe mar dijiye

main puchhne laga hun sabab apne qatl ka

main had se baDh gaya hun mujhe mar dijiye

karta hun ahl-e-jubba-o-dastar se sawal

gustaKH ho gaya hun mujhe mar dijiye

KHushbu se mera rabt hai jugnu se mera kaam

kitna bhaTak gaya hun mujhe mar dijiye

malum hai mujhe ki baDa jurm hai ye kaam

main KHwab dekhta hun mujhe mar dijiye

zahid ye zohd-o-taqwa-o-parhez ki rawish

main KHub jaanta hun mujhe mar dijiye

be-din hun magar hain zamane mein jitne din

main sab ko manta hun mujhe mar dijiye

phir us ke baad shahr mein nachega hu ka shor

main aaKHiri sada hun mujhe mar dijiye

main Thik sochta hun koi had mere liye

main saf dekhta hun mujhe mar dijiye

ye zulm hai ki zulm ko kahta hun saf zulm

kya zulm kar raha hun mujhe mar dijiye

zinda raha to karta rahunga hamesha pyar

main saf kah raha hun mujhe mar dijiye

jo zaKHm banTte hain unhen zist pe hai haq

main phul banTta hun mujhe mar dijiye

barud ka nahin mera maslak darud hai

main KHair mangta hun mujhe mar dijiye