kaghaz kaghaz dhul uDegi fan banjar ho jaega

kāġhaz kāġhaz dhuul uḌegī fan banjar ho jā.egā

jis din sūkhe dil ke aañsū sab patthar ho jā.egā

TūTeñgī jab niiñd se palkeñ so jā.ūñgā chupke se

jis jañgal meñ raat paḌegī merā ghar ho jā.egā

ḳhvāboñ ke ye panchhī kab tak shor kareñge palkoñ par

shaam Dhalegī aur sannāTā shāḳhoñ par ho jā.egā

raat qalam le kar aa.egī itnī siyāhī chhiḌkegī

din kā saarā manzar-nāma be-manzar ho jā.egā

nāḳhun se bhī iiñT kuredeñ mil-jul kar ham-sā.e to

āñgan kī dīvār na TuuTe lekin dar ho jā.egā

'qaisar' ro lo ġhazleñ kah lo baaqī hai kuchh dard abhī

aglī rutoñ meñ yuuñ lagtā hai sab patthar ho jā.egā

kaghaz kaghaz dhul uDegi fan banjar ho jaega

jis din sukhe dil ke aansu sab patthar ho jaega

TuTengi jab nind se palken so jaunga chupke se

jis jangal mein raat paDegi mera ghar ho jaega

KHwabon ke ye panchhi kab tak shor karenge palkon par

sham Dhalegi aur sannaTa shaKHon par ho jaega

raat qalam le kar aaegi itni siyahi chhiDkegi

din ka sara manzar-nama be-manzar ho jaega

naKHun se bhi inT kureden mil-jul kar ham-sae to

aangan ki diwar na TuTe lekin dar ho jaega

'qaisar' ro lo ghazlen kah lo baqi hai kuchh dard abhi

agli ruton mein yun lagta hai sab patthar ho jaega