kaghzi kashti ki aamad ka ishaara mil gaya

kāġhzī kashtī kī aamad kā ishāra mil gayā

Dūbne vaale ko tinke kā sahārā mil gayā

ho gayā shāmil ġharaz kā rañg mauj-e-ishq meñ

jhiil ke nithre hue paanī meñ gaarā mil gayā

ghul ga.ī betābī-e-dil vaqt ke mahlūl meñ

zabt ke Thahre hue paanī meñ paara mil gayā

dil ke kārobār meñ hāsil kī koī shart hai

mil gayā is raah meñ jis ko ḳhasāra mil gayā

nā-mukammal ḳhvāhishoñ kā dard kho dene ke ba.ad

yuuñ huā phir vo mujhe saare kā saarā mil gayā

rakh chukā hai rehn vo pahle hī apnī raushnī

kis sitāre se mire dil kā sitāra mil gayā

ḳhud luTā kar chhoḌ aa.e jis kī ḳhātir kārvāñ

rahzanoñ ke saath vo rahbar hamārā mil gayā

kho gayā vo kis tarah jis ko kabhī paayā nahīñ

jis ko paayā hī nahīñ kaise dobāra mil gayā

sabz parcham ko milī āzād mausam kī havā

ham ko apnī sar zamīñ kā chāñd taara mil gayā

kaghzi kashti ki aamad ka ishaara mil gaya

Dubne wale ko tinke ka sahaara mil gaya

ho gaya shamil gharaz ka rang mauj-e-ishq mein

jhil ke nithre hue pani mein gara mil gaya

ghul gai betabi-e-dil waqt ke mahlul mein

zabt ke Thahre hue pani mein para mil gaya

dil ke karobar mein hasil ki koi shart hai

mil gaya is rah mein jis ko KHasara mil gaya

na-mukammal KHwahishon ka dard kho dene ke baad

yun hua phir wo mujhe sare ka sara mil gaya

rakh chuka hai rehn wo pahle hi apni raushni

kis sitare se mere dil ka sitara mil gaya

KHud luTa kar chhoD aae jis ki KHatir karwan

rahzanon ke sath wo rahbar hamara mil gaya

kho gaya wo kis tarah jis ko kabhi paya nahin

jis ko paya hi nahin kaise dobara mil gaya

sabz parcham ko mili aazad mausam ki hawa

hum ko apni sar zamin ka chand tara mil gaya